Eto Lang
ni Gab Caraon

eto na naman ako
isang bato
isang batong nakahimlay sa dalampasigan
laging nakatingin sa lawak ng dagat
laging nangangarap na balang araw ay marating din
ang mga narating niya
laging umaasang balang araw ay dalhin ako ng alon
sa ibang lugar
at sumabay sa sayaw ng pag-agos ng buhay
eto na naman ako, nangangarap.
pero eto nga ako. isang bato.
mabigat. matigas. hindi makagalaw.
at hindi tulad ng dagat na madaming nagagawa,
ako na isang bato ay hindi man lang kayang lumuha.